Eso asegurou este martes o alcalde durante a inauguración do curso de Educación Infantil na Escola Pública de Lavadores. Abel Caballero defendeu “incrementar” a oferta de prazas públicas para este tramo educativo “pola “gran demanda existente” e lembrou que as 458 vacantes nos centros municipais recibiron máis de mil solicitudes.
Segundo detallou, as seis escolas para nenos e nenas de 0 a 3 comezan o curso con 322 alumnos e alumnas admitidos neste momento e outras 136 prazas na quenda de tarde que se irán cubrindo paulatinamente. O Concello, salientou “adica 1,3 millóns cada ano para subvencionar estes centros educativos e achega 63.000 euros para a “Galiña Azul” da Xunta de Galicia na rúa Palencia”.
O alcalde explicou que o Concello exime do total do pago da tarifa, “sen incremento algún desde 2008” á metade do alumnado,”cun promedio de subvención do 86% do coste a cada alumno”, e indicou que o prezo máximo de pago nunha escola infantil do Concello ascende a 124 € mensuais, “a metade do tope das que oferta en Vigo a Xunta”.
Caballero adiantou que a futura escola de Mestres Goldar abrirá próximamente cun centenar de vacantes e “en breve” darán comezo os traballos dun novo centro en Navia, coa previsión de entrada en funcionamento no curso do 2015 e, asegurou “estamos estudando ubicacións para un novo centro”.
