Uns 60 mariñeiros da flota cefalopodeira galega están a paralizar dende primeira hora deste domingo a descarga de polbo conxelado que chega ao Porto de Vilagarcía en contendores procedentes de Canarias. Entre os concentrados está o responsable da CIG-Mar, Xabier Aboy, quen asegurou a esta redacción que, na actualidade, “por culpa dun acordo liquidador da Xunta e do Goberno central, 24 barcos galegos que faenaban en Mauritania dende hai décadas foron expulsados daquelas augas e os caladeiros están ocupados por barcos asiáticos”.
“A flota galega quedou esnaquizada, máis de 200 familias non teñen ingresos, e non se fai nada para acabar con esta situación…suponse que estamos na Unión Europea e que pode presionar para arranxar a situación, pero nin hai interese nin parece que a Feijóo e Rajopy lles importe o desmantelamento”.
Neste intre, os pescadores, que non van deixar baixar os contedores e que esixen que volva nao porto de orixe, manteñen conversas, no mesmo peirao, co director da Autoridade Portuaria, a compañía dona dos barcos que estaban descargando e a Garda Civil.
