A Universidade de Vigo entrou, por primeira vez, no ranking das 100 mellores universidades do mundo de menos de 50 anos, un listado que elabora The Times Higher Education e que recoñece e pondera os resultados de investigación, calidade docente, internacionalización e transferencia de institucións académicas novas.
Vigo colocouse no posto 77 e, cunha puntuación de 33,8, segundo The Times Higher Education é a décimo quinta universidade española no campo científico e que ten a transferencia de coñecemento como «prioridade institucional».
Entre este centenar de novas universidades seleccionadas só hai seis españolas, incluíndo a da cidade olívica. Concretamente, no posto 22 está a Autónoma de Barcelona, no 25 a Pompeu Fabra, no 52 a Autónoma de Madrid, no 77 a de Vigo, no 80 a Politécnica de Valencia e no 99 a Politécnica de Cataluña, sendo todas elas públicas.
Este listado está encabezado pola Pohang University of Science and Technology (Corea), seguida da École Polytechnique Fédérale de Lausanne (Suíza) e o Korea Advanced Institute of Science and Technology.
