A conselleira de Medio Rural e do Mar esixiu este venres explicacións a Francia, a quen acusou de querer «tapar as súas carencias a custa das virtudes dun dos mellores centros do mundo» en materia de control da calidade das augas, o Intecmar. Rosa Quintana acusou ás autoridades galas de tentar danar a imaxe «dun dos sectores máis responsables de Europa», por o da produción e extracción de mexillón en Galicia.
Na súa intervención no almorzo informativo ‘Fórum Europa. Tribuna Galicia’, Quintana lembrou que, como quedou comprobado a través da rede europea de alertas sanitarias, finalmente, e en contra do que comunicaron publicamente os ministerios de Agricultura e Sanidade franceses, o mexilón que provocou varios casos de gastroenterite naquel país, foi tratado en depuradoras do mesmo.
A conselleira subliñou que o sector galego, o que «non quere para si, tampouco o quere para ninguén» e calificou ao sistema de control sanitario de Galicia como «paradigma con maiúsculas dentro da Unión Europea». Quintana engadiu que o Intecmar “é un centro ao que poñen de exemplo en Europa e ao que veñen do resto dos Estados membro a aprender, e falo de falo de irlandeses, de portugueses, de turcos, de italianos, de ingleses, de alemán… e, por suposto, falo de franceses», concluiu.
