A través dun comunicado, o comité de empresa da televisión pública galega denuncia as «presións e intervencións» que, segundo alertan, reciben «acotío» os profesionais do medio. Os traballadores salientan que esta situación «agravouse nos últimos meses por mor dos diversos casos de corrupción política que están a sair á luz pública, como por exemplo o caso Pokemon ou, nos últimos días, o chamado caso Bárcenas».
Os representantes dos traballadores consideran «especialmente penosas e vergoñentas» estas prácticas de «manipulación da televisión pública» no actual contexto de «grave crise económica e profundo deterioramento político e social». «Xusto cando unha cidadanía en gran parte empobrecida e indignada exixe máis que nunca o seu dereito de acceso a unha información veraz, plural e obxectiva», destacan.
Ademais, o comité de empresa denuncia «a ausencia dun mecanismo que evite as presións coas que teñen que traballar cada día os profesionais» e que garanta «a liberdade e a indepencia no exercicio dos seus labores informativos».
Novas vencelladas: Información da TVG sobre a entrega dos ‘papeis de Bárcenas’ por parte do diario ‘El País’
