Urxencias Sanitarias de Galicia-061 asistiu durante a Ponte do Pilar un total de 86 persoas debido a 63 accidentes de tráfico ocorridos nas estradas galegas. O maior número de atencións por sinistros rexistráronse o sábado, día 13, con 22 accidentes.
A Central de Coordinación do 061 recibiu nestes días 77 chamadas en relación cos accidentes de tráfico. Estas alertas xeraron 63 asistencias sanitarias por parte do persoal do 061 que atenderon a un total de 86 persoas.
Os recursos sanitarios mobilizados foron 85. Así, ambulancia medicalizada acudiu a nove sinistros, as ambulancias asistenciais mobilizáronse en 67 sinistros, as ambulancias convencionais acudiron a tres accidentes, e os médicos de Atención Primaria que medicalizan as ambulancias asistenciais do 061, no caso de necesitalo, prestaron asistencia sanitaria en seis sinistros.
En 67 casos os feridos foron trasladados aos centros hospitalarios correspondentes, nove persoas foron trasladadas a un centro de Atención Primaria, outros 10 foron atendidos no propio lugar do incidente sen necesitar traslado.
Por provincias, foi Pontevedra a que rexistrou máis accidentes con 28 sinistros de tráfico durante os desprazamentos destas datas, seguido por A Coruña con 21, Lugo con 11 e Ourense con 3.
