No acto os presentes reivindicaron máis democracia, máis soberanía e máis traballo na Galiza. O voceiro nacional do Bloque reivindicou un “novo modelo de Unión Europea” e amosou a necesidade de botar ao lixo o neoliberalismo “temos que apostar por unha política distinta: a actual lévanos a un calexón sen saída”, asegurou.
Baixo o lema ‘Soberanía, Democracia e Traballo‘, os manifestantes saíron pasadas as 12 e media do serán da Alameda para chegar á Quintana coreando ‘Galiza ceibe poder popular’, ‘Na Galiza en galego’, esixindo a autodeterminación, portando carteis coa imaxe de Rosalía e Castelao e suxeitando outros nos que se leía ‘tempo de compromiso con Galiza’.
O Bloque tamén invitou a 19 delegacións do resto e de fora do Estado, entre elas de Aralar, Eusko Alkartasuna, o Partido Nacionalista Vasco, Esquerra Republicana de Catalunya, Bildu ou do Fronte Polisario. Logo da movilización, coma cada ano, tivo lugar un xantar na Carballeira de Santa Susana.
