Noemí Rey/ Duvi/ Ofrécese contrato a persoa licenciada para realizar tese de doutoramento durante tres anos «con salario competitivo». Aínda que nos tempos que corren pareza incrible, esta é a oferta que o Departamento de Química Física fai para un novo proxecto financiado con máis de 110.000 euros pola Xunta, un oasis no deserto de noticias sobre a falta de fondos para contratar investigadores. “Se os cartos que che dan chegan é normal que contrates a alguén para formalo nun campo determinado e procurar que reverta na sociedade. O problema é que en época de crise recórtase o financiamento porque parece que aínda non temos asumido que promover a investigación é o xeito de saír dela e acadar un estado de benestar bastante aceptable”, explica Carlos Bravo, investigador principal do grupo que acadou a subvención.
Se hai uns anos o 1% do PIB de Galicia estaba destinado a I+D, cunha evolución de crecemento continuo, as novas circunstancias económicas obrigan a facer importantes recortes que se traducen nunha redución dos fondos autonómicos do 40% e na incorporación de só 15 científicos ao Sistema Galego de Innovación. O resultado, que “a xente se asusta ao pensar que ten que estar tres ou catro anos máis na facultade facendo a tese, porque son apostas a longo prazo. A vida dá moitas voltas e non se sabe se a crise vai empeorar ou non. Hai moita inestabilidade, a carreira investigadora é demasiado longa e a xente prefire algo máis práctico, aínda que supoña marchar ao estranxeiro”, recoñece Bravo.
Perda de cerebros
Por iso a oferta da canciller alemá Angela Merkel soa a música celestial para moitos licenciados e pode converterse nun pesadelo para os que quedan aquí. “Non poden pretender potenciar a investigación colléndoa con pinzas, porque acaba caíndo polo seu propio peso. Non é fuga de cerebros, é perda, porque ti estalos a formar para que produzan noutro lado”, analiza o investigador. Un cúmulo de circunstancias que tamén repercute de xeito negativo nos grupos investigadores da universidade viguesa, xa que non é doado atopar xente para un traballo tan específico. “Non soen chegar moitos currículos porque moitos acaban a carreira e desenténdense e a maioría dos que quedan xa están financiados dalgún xeito. Hai pouco unha compañeira díxome que tardara catro ou cinco meses en conseguir a unha persoa. Eu espero que non sexan tantos”, asegura o investigador. Nestes casos o boca a boca é o que funciona, por iso a oferta divúlgase a través do circuíto da Universidade.
Buscas investigacións?
Se traballas no eido da química ou da tecnoloxía de alimentos, xa que o traballo está ”a cabalo” entre os dous sectores, aquí podes ter unha oportunidade. O contratado tería que realizar a investigación interdisciplinar dun proxecto relacionado coa eficacia e distribución de antioxidantes en sistemas emulsionados de alimentos, o que lle serviría para a tese de doutoramento. Ter experiencia en métodos cinéticos e analíticos como espectrocopias ou cromatografía terá puntos extra. “Se ten experiencia nun laboratorio é moito mellor, porque ao principio á xente cústalle adaptarse ás novas técnicas, aos novos métodos”, puntualiza Carlos Bravo. Se estás interesado, envía o teu currículo detallado por correo electrónico á atención de Carlos Bravo a [email protected].
