RGPD - Cookies
Cultura Galicia

A dramaturga Vanesa Sotelo gaña cunha obra en galego un certame de teatro catalán

A dramaturga, actriz e xornalista Vanesa M. Sotelo.
A dramaturga, actriz e xornalista Vanesa M. Sotelo.

Unha viaxe pola historia de dous estudantes que se inmolaron a finais dos 70 para protestar contra a invasión de Checoslovaquia valeulla á dramaturga, actriz e xornalista Vanesa M. Sotelo o premio de teatro Josep Robrenyo, un dos máis destacados da escena catalá. A canguesa leva este premio de experimentación teatral dotado con 3.000 euros pola obra ‘Memoria do incendio’, unha obra basada nunha historia que descubriu tras unha viaxe a Praga, e que competía con outras 47 candidatas de toda España escritas en diferentes linguas.

‘Memoria do incendio’ foi o único traballo presentado en galego, un idioma que tamén se levou o premio hai dou anos a través da obra ‘Canibalismo’, de Marcos Abalde. A obra de Sotelo presenta un estado de opresión e denuncia a través de diversos personaxes que aparecen nunha sala de autopsias en desxeo.

A dramaturga, membro do consello de redación da Revista Galega de Teatro, xa ten no seu haber o Premio do xurado do IV Certame Diario Cultural de Teatro Radiofónico. Formada en xornalismo e dirección de escena, o seu traballo hoxe está ligado á compañía galega Inversa Teatro, para quen ten dirixido os espectáculos ‘Kamouraska’ e ‘A illa das mulleres tolas’.

También te puede interesar