Catro grupos, catro nacionalidades e catro formas distintas de ver as tradicións. O Parque Laxal en Rebordáns servirá esta noite de esceario (21:30 horas) para a undécima edición da Noite Internacional do Miño, organizada pola Escola de Baile e Gaitas ‘San Fins’ de Rebordáns.
Esta noite os protagonistas serán os grupos de catro países ben distintos que van presentar un espectáculo único cheo de cor e de sons: o Bodrog Folk Dance Group, de Hungría; o Klub Tari Peminatan de Indonesia; o Camarguais Cordon de Francia; e o Özgur Adimlar Culture and Association de Chipre.
Catro grupos que, pese as características concretas do seu folclore, comparten a súa preocupación pola preservación e o mantemento da cultura tradicional e que actúan en festivais internacionais onde exhiben as peculiaridades da súa música e do seu baile ateigando sempre os seus escearios de público.
