Declaracións da directiva da Asociación Veciñal de Coia “Camiño Vello” ante a inauguración da Rúa Marín o pasado xoves, 10 de decembro de 2010.
O pasado xoves, 10 de decembro, o Sr. Alcalde, D. Abel Caballero, achegouse ata a Rúa Marín para inaugurar as obras desta Rúa, a pesar de que as obras de humanización non están rematadas na contorna do barrio.
A directiva desta asociación quere manifestar o seu agrado polo investimento feito nesta rúa logo de tantas e tantas solicitudes realizadas desde esta entidade (mellora do asfalto, mellora das beirarrúas, mellora da rede de saneamento e abastecemento, mellora das luminarias…) Todo este investimento repercute directamente na calidade de vida da veciñanza pola que tanto traballa o movemento veciñal desde hai 40 anos. Nembargantes, continuamos sen comprender algunhas cuestións relativas ás consecuencias derivadas destas obras:
– Por máis que o Sr. Alcalde diga que as prazas de aparcadoiro son as mesmas que antes das obras, podemos asegurar que isto non é así, de feito a cuantificación que tiñamos realizada antes das obras era de 97 prazas reais ante as 69 actuais (non 62). A esta redución de prazas vemos como se une a incisiva actuación da policía local á hora de denunciar estacionamentos incorrectos, cando antes os vehículos ocupaban beirarrúas e pasos de peóns e non facían nin caso.
– Continúa a preocuparnos o servizo de transporte público xa que o sentido único destas rúas impide un servizo áxil e de calidade para toda a cidadanía, porque insistimos en que si vives ao final da ría Bueu ou Moaña non é igual coller ou deixar o autobús na rúa Vilagarcía que na Avenida de Castelao.
– Non comprendemos por que un acto que nos debería encher de orgullo a toda a veciñanza, como é a inauguración dunha das nosas rúas, non é un acto público no que se convoque a representantes veciñais, porque guste ou non estamos a traballar por un barrio mellor, pero isto non o poderemos acadar se a clase política non predica co exemplo.
– Lamentamos que no cruce da rúa Marín con Vilagarcía non se respectara a mellora que solicitarmos hai tempo e que impedía o embalsamento de augas cando chove, pero esta non é máis que unha das consecuencias de ter feito un proxecto alonxado das necesidades reais da cidadanía.
Esperamos continuar a ver como o noso barrio mellora e confiamos en que a clase política comece a confiar na veciñanza soberana, porque humanizar non é posible se non comezamos por cada un de nós.
A directiva aproveita esta ocasión para lles desexar felices festas!!
