Baixo o título “A directiva de servizos da Unión Europea e as Corporacións Locais”, a Consellería de Presidencia, Administracións Públicas e Xustiza organiza unhas xornadas para analizar e debatir dita directiva e as súas repercusións sobre as Administracións Locais.
Terán lugar o vindeiro luns día 14 de decembro no salón de actos da Delegación Territorial da Xunta en Vigo e a responsable do Goberno galego na cidade, Lucía Molares, será a encargada de inauguralas. Dirixidas principalmente a profesionais que levan a cabo a súa labor nas Administracións Locais, contará con representantes de diversas institucións de Vigo, Ourense e Pontevedra.
As xornadas comezarán ás 17.00 horas da man da delegada territorial para, logo, comezar coas intervencións dos ponentes convidados nunha mesa redonda. Así, participarán o secretario xeral da Deputación Provincial de Ourense, Francisco Cacharro; a secretaria xeral do pleno do Concello de Vigo, María Concepción Campos; o secretario de Administración municipal do Concello de Pontevedra, José Carlos Castiñeira e, por último, o secretario xeral do pleno do Concello de Pontevedra, José Luis Mato. A continuación, haberá unha pausa-café para retomar máis tarde o debate cun coloquio aberto a todo o público asistente e rematar así as xornadas sobre as 20.00 horas.
As xornadas servirán para debatir e por enriba da mesa a directiva de servizos da Unión Europea que entrou en vigor no ano 2006 e que ten coma obxectivo a eliminación de obstáculos innecesarios e desproporcionados para a prestación de servizos. Neste senso, abordarase tamén a recente aprobación polo Goberno galego da Lei Omnibus o pasado 3 de decembro, que afecta a 24 leis autonómicas co obxectivo de aplicar os principios da libre competencia no mercado interior europeo e que, coma xa sinalou o conselleiro de Presidencia, Administracións Públicas e Xustiza, Alfonso Rueda, o día que o Consello da Xunta lle deu o visto e prace a esta normativa, sitúa a Galicia na vangarda de España na transposición da directiva europea de servizos, permitindo reducir así as trabas aos emprendedores ademais de impulsar o investimento.
