Vigo al minuto

@carmelasilva pedirá ao Goberno que a provincia sexa declarada zona afectada gravemente por unha emerxencia

Carmela Silva, anunciou este luns en rolda de prensa que este martes, na reunión convocada pola Delegación do Goberno, pedirá que Galicia -e a provincia de Pontevedra, particularmente- sexa declarada como “zona afectada gravemente por unha emerxencia de protección civil”, tal como aparece recollido na Lei 17/2015 do sistema nacional de protección civil que foi aprobada, lembrou Carmela Silva, “en xullo de 2015, polo actual Goberno estatal”.

A presidenta da Deputación amosouse “sorprendida” porque, oito días despois desta catástrofe, o Goberno de Galicia nin fala desta lei nin fala de que vaia pedir esta declaración, cousa que chama á atención”. De feito, asegurou,“nesta reunión non soamente vou pedir a aplicación desta lei no vindeiro Consello, de xeito inmediato, senón que tamén vou preguntar por que non se puxo en marcha ata este momento”.

Unha vez declarada a zona gravemente afectada, as medidas aplicables inclúen “axudas económicas a particulares por danos na vivenda habitual e bens de primeira necesidade ou compensacións a administracións locais por gastos derivados de actuacións inaprazables”, explicou Silva.

Respecto a este último, a presidenta da Deputación sinalou que “hoxe atopámonos con que o alcalde das Neves precisa un apoio urxente de enxeñería, arquitectura e avogacía porque a vila está nunha situación de extrema gravidade”. Ademais, a lei tamén establece “axudas destinadas a establecementos industriais, mercantís e de servizos”, ao que Carmela Silva lembrou que se viron “afectadas naves, empresas e moitas persoas autónomas”, así como “axudas por danos en producións agrícolas, gandeiras, forestais e de acuicultura mariña, que na nosa provincia foron gravísimos”.

Todas estas medidas, salientou, “son directas, só hai que declarar a zona gravemente afectada para que se apliquen de maneira inmediata. Como é posible que ninguén o solicitase?”.

También te puede interesar