Máis de medio cento de delegados sindicais da CIG desenvolveron hoxe unha concentración diante da Inspección de Traballo en Vigo, de 11:30 a 12:30 horas, para denunciar a inacción da autoridade laboral fronte aos incumprimentos do convenio do naval, o que está a provocar un “incremento da explotación e da precariedade no sector, e a falta de implicación da Xunta na grave crise que padece unha industria estratéxica para o país e fundamental para a comarca”.
Dende a CIG-Industria explican que o naval, un dos sectores económicos “máis importantes da economía galega e prioritario na comarca de Vigo”, leva 6 anos de “parálise na contratación” pola falta de compromiso político das distintas Administracións no que atinxe á defensa dos sectores produtivos galegos ante a Unión Europa, mais tamén pola falta dun plan industrial específico.
Segundo denuncian, esta situación agravouse pola “mala xestión dalgúns estaleiros, que levou á destrución de máis de 100 empresas e 10.000 postos de traballo”, entre elas moitas das históricas e coa estrutura necesaria para poder liderar unha futura recuperación do sector. Ademais, a alertan que a desregulación actual compromete o futuro das poucas que lograron resistir.
Lembran que nos anos anteriores á crise, cunha alta carga de traballo, os empregados foron quen de converter o convenio do sector nun referente a nivel estatal. “Non nos regalaron nada, todo se logrou a base de loita, a loita lexítima da nosa clase para alcanzar as mellores condicións salariais e de traballo”.
Neste senso, o responsábel do Naval da CIG-Industria de Vigo, César Rodríguez, criticou o feito de que agora, cando se visualiza unha tímida recuperación do sector logo de tocar fondo, pretenden precarizar estas condicións de traballo até niveis “de escravitude”, chegando a cobrar un “imposto revolucionarios ao traballo” por parte dalgunhas “mal chamadas” empresas; o “incumprimento do convenio é maioritario, facéndolle unha competencia desleal ás poucas compañías que entenden a necesidade da regulación para garantir a estabilidade e o futuro do sector”.