Arredor de 150 traballadores de ambulancias desenvolveron este mércores pola mañá unha protesta diante de Ambuiberica en Vigo para denunciar o incumprimento do convenio por parte da empresa, sobre todo en materia de saúde laboral. A compañía, que xestiona as Urxencias do 061 en varias zonas do país, presenta, segundo os representantes da plantilla, deficiencias á hora da desinfección e lavado dos uniformes e das bases.
A mobilización, na que participaron empregados de A Coruña, Vigo, Pontevedra e Santiago , desenvolveuse diante das instalacións da empresa na rúa Colombia, ata as 12 e media da maña. Alí despregaron unha faixa contra a precariedade no sector e berraron consignas para reclamar unha solución ao conflito laboral.
Os empregados do sector denuncian os problemas que padecen a causa dos incumprimentos da empresa na aplicación do convenio colectivo, sobre todo en materia de saude laboral, polas deficiencias en canto á desinfección e limpeza dos unifermos de traballo e das bases.
Trátase dun problemática que se reproduce nas distintas zonas onde Ambuiberica ten a concesión das Urxencias do 061 nas provincias da Coruña e Pontevedra, entre elas Vigo e o Baixo Miño. De feito, o cadro de persoal da área sanitaria de Santiago xa desenvolveu protestas polos mesmos motivos con anterioridade.
A intención dos traballadores é continuar coas mobilizacións nas vindeiras semanas, sen descartar incluso a convocatoria dunha folga no servizo, xa que a súa preocupación vai en aumento despois de coñecer que a empresa -á que a CIG ten sinalado pola súa vinculación ao PP- opta tamén a facerse coa xestión dos servizos non urxentes do 061.